ഒരു കഷ്ണം മരവിപ്പ്

ആദ്യം

നിറയെ ശലഭങ്ങളായിരുന്നു.

ചുവപ്പും മഞ്ഞയും, കറുപ്പും കലര്‍ന്നവ.

വഴിയിലൊക്കെ

മുന്‍പിലും പിറകിലുമായ്

അവ വല്ലാതെ ചിറകടിച്ചു പാറി,

അതിലൊന്നു മേശമേല്‍ വന്നൂ

കറങ്ങി വീഴും വരെ.

പിന്നെ പല്ലികളാ‍യ്

അവ ഓരൊ ചെയ്തികളുമായി

എപ്പോഴും വന്നു.

നടക്കവെ കുറുകെ ചാടി,

മച്ചിന്‍ പുറത്തുനിന്നു

താഴേയ്ക്കു വീണു.,

പാത്രം കഴുകുമ്പോള്‍

മതിലോരം ചേര്‍ന്നു

ഒന്നിനോടൊന്നു പിടഞ്ഞു

മറിഞ്ഞു.

അവസാനം ഫ്രിട്ജ്ജ് തുറക്കെ ഉള്ളില്‍

മരവിച്ചൊന്നു ചേര്‍ന്ന

ഒരുകഷ്ണം പ്രണയമാകും വരെ.